‘t Bestuer van de Nederlaandse Hoonderclub hef ‘n in 2004 Nederlaader Ad Boks en ‘n Duutser Roland Weber willig eveunden, zoonder eaigenbate, dit informatiebeukske oawer de Nederlaandse hoonderrassen in mekaar te zetten. Beaide zint boeten eere greanzen bekeand wat disse dinge angeet. Biej ieder ras is nen ofbeelding wieregeawen, den emaakt is duur Roland Weber, de grote driefveare van de Nederlaandse hoonderrassen in de Pruus. Ad Boks en Roland Weber wördt, ‘n ieder van oet zien eaigen zeenswieze, beschouwd as naar vakbekwoam.
‘t Bestuer is eerleu daankbaar vuur eer andeel. Janny van Wulfften Palthe-Stulen hef ‘t in ‘t Twentse dialect ummezat. Zo wied as bekeand is dit ‘t eerste hoonderbeukske in de Twentse sproake.
De bedooling van dit beukske is ne biedrage te leavem an de promosie van Nederlaandse hoonderrassen. Dit beukske koomp vuur ‘t lech in ‘t Nederlaands, Engels, Duuts en noe ok in ‘t Twents. Völle leas- en kiekplezear ! !
Twentse Grîezen.
Dit ras is ontstoan in de greansstrekke van Twente en de Duutse groafschop Bentheim. In 1884 kwammen de Twentse Grîezen vuur de eerste moal op nen tentoonstelling vuur ‘n dag.
Vanof 1919 prezenteerden ze zich stöadig op de tentoonstellingen an wearskaanten van ‘n poal oonder ‘n naam Kraienköppe. Um duur mekaar hén halen met de völ oaldere Kreaiköppe te vuurkommen is allenig in oons laand ‘n naam veraanderd in Twentse Grîezen.
Vuur ‘t ontstoan van dit ras mu-w wierumme noar de joaren 1850 – 1860. In dee tied wörden in Twente regelmoatig Maleier hanen ekruust met de doar vuurhaande weande boerenhennen. De hanen dee oet disse kruusing voortkwammen kregen bekeandheaid as ‘Biethoonder’, dee naar geweeld warren as vechhanen.
De Twentse Grîezen valt nog aait op duur eere vechhoonderachtige hoalding. ‘t Ras hef nen walnöttenkam, gelle peute en is oonder de grote Twentsen erkeand in veer kluerslagen: petries, zilverpetries, blaauw- en blaauwzilverpetries en biej de krielen in de klueren petries, zilverpetries en roodgeschoolderd-wit.
